بسم الله الرحمن الرحيم والصلاة والسلام على سيدنا محمد
كتير من الشباب اللى دخلووو مجال الجرافيك والموشن الفترة الاخيرة .. فى منهم اللى وصل لمستوى عالى فى التصميم وجاهز انه يحتك بسوق العمل. ولكن بينقص انه عاوز يعرف أزاى يقدر يوصل لأول عميل.
فى المقالة دى هاعرض لحضرتك أكتر من فكرة. أزاى تركب الترند والأنبوكس عندك يكون مليان رسايل وكلهم عاوزين يتعاونوا معاك .
هاكتبلك العناصر هنا .. وهاشرح كل عنصر بالتفصيل
أولا:-
لابد من إنشاء صفحة تحمل هوية خاصة بك وأسم لشركتك حتى لو كنت شغال من البيت .
ثانيا:-
إنشاء بورتفليو على موقع بيهاينس.
ثالثا:-
البحث عن الأعلانات على أوليكس وموقع يلو بيدج.
رابعا:-
مشاركة تصميماتك فى الجروبات ذات التفاعل العالى والتى يتواجد عليها شركات الدعايا والاعلان وشركات التسويق وغيرهم من المهتمين من التعاون المباشر معك.
خامسا:-
إنك تركب الترند. ودى أهم نقطه.
سادسا:-
الطريق صعب أوى إياك واليأس.
سابعا:-
الهدية بقى . لينكات الجروبات أكتر من 140 جروب هدية من مهندس مصطفى سعيد
هاستعرض الان شرح النقاط بالتفصيل
1- لابد من إنشاء صفحة على الفيس بوك وإختيار أسم للصفحة وعمل لوجو وباك جراوند. وبعدها تبدأ تنشر اعمالك بأستمرار على الصفحة بمعدل تصميم كل يومين. هاتبص تلاقى تصميماتك قربت تخلص . أبدأ نزل موضوعات هامه تخص الجرافيك والموشن. أشرح اى شىء فى تحديث نسخ أدوبى. كل الحاجات دى بتدى مصدقية لأى عميل يدخل صفحتك إنة يلاقى عناصر موجودة حتى لو مفيش تفاعل. بس بيتأكد إنك مصمم موجود بالفعل ليك صفحة وليك أنشطة شبة يومية على السوشيال ميديا. هنا العميل هايتعاون معاك وهو متأكد إنك فعلا أبن المجال ومش هايكون قلقان من التعامل معاك. وكمان هايكون ليك متابعين من المبتدئين اللى بيهتمو يشوفو شغلك وياخدو منه أفكار. وهنا أول طريق الفولورز.
2- تدخل على موقع بيهاينس وتعمل أكونت وتحط اعمالك وتحط اللوجو بتاعك وتجهز نفسك لمشقة البحث عن أول عميل.
3- أبليكيشن أوليكس و موقع يلوبيدج. أنهاردا فى مصر يعتبروا من اهم المواقع اللى عليهم شغل. ولو سئلت أى حد بدأت منين هايقولك عليهم. لو دخلت على أوليكس فى خانه وظائف ثم ( مصمين او تسويق وعلاقات عامه ) هما دول اهم خانتين فى أوليكس يهموك أوى. هاتلاقى وظايف بالهبل سواء فرى لنسر أو عاوزين حد فى الشركة او شغل بالقطعه ...إلخ. ثق وتأكد إن دول عمرهم ما هايتعملوا معاك إلا بعد ما يشوفوا شغلك ويتأكدوا إنك الشخص المناسب ليهم حتى لو كان سعرهم قليل. هما عاوزين واحد كويس وهى دى إمكانياتهم المادية، والسوق عرض وطلب!. كل اللى عليك هاتاخد رقم العميل. وتبعتله على الواتس اب؛ انا فلان مهندس فى كذا وكذا ودا البيهاينس بتاعى. وهنا العميل هاياخد جولة فى أعمالك. ولو العميل شاف شغلك أنت هاتعرف لأن بيجيلك عدد الزيارات على البيهاينس. لو مردش عليك. لازم تراجع نفسك وتأخد رأى أهل الخبرة قبل ما ترفع الشغل دا. علشان من الوهلة الأولى ينال ثقة المتابعين ليك
4-هاترفع كل شغلك على البيهاينس وتدخل على الجروبات تنشر شغلك. أزاااااااااااااااااااااى؟
هاتنشر صورة وتحط فوقها لينك البيهاينس. وتكتب نبذة على الصورة اللى هاتحطها برة واللى هاتجذب الناس إنهم يدخلوا البيهاينس بتاعك يتفرجوا. مثلا تكتب بروجيكت شركة كوكاكولا لمشاهدة المشروع كامل أدخل على لينك البيهاينس. هنا لو الصورة تعبانة اللى انت حطتها برة وكان هدفك تجذب بيها الزوار. يبقى انت بتنفخ فى إربة مخرومة!، وهاتاخد تريقة للصبح وهاتكون أضحوكة الجروبات ويبقى أنت اللى جنيت على نفسك وممكن تكون نهايتك لأنهم هيحفظوا علامتك التجارية وكل ما يشوفو شغلك هايستلموك حتى لو كان فى تحسن. أما لو شغلك ممتاز ومستوى عالى. هاتلاقى الأنبوكس بتاعك مليان رسايل .. ممكن تعملى كتاب ممكن تمسكلى صفحة أسعارك اية .. وهكذا. علشان كدا بقولك خد رأى أهل الخبرة قبل ما تبدأ فى النشر. وأخوكم موجود لأى أستشارة بأذن الله. بالتوفيق
5- أزاى أركب الترند!؟
أولا:- فى حدث عالمى دايما متواجد. لازم تواكب الترند وتنشر على طول فى الجروبات، مثلا لما جت الكرونا كل الناس اتجهت لعمل تصميمات للوقاية من كرونا وشيرو التصميمات فى الجروبات. وجالهم شغل تبع وزارة الصحة و دكاترة تواصلوا معاهم للتعاون المستمر وغيرو.
مثلا مبارة للاهلى والزمالك تعمل بوستر أو فيديو لأهم اللقطات بين الفريقين. تاريخ مشاركات الفريقين. أى فكرة تيجى على بالك أشتغل عليها وشارك على الجروبات هاتلاقى الناس اللى مهتمية بالترند دا بيكلموك. وكتير من الناس عمل كدا ومش حابب أذكر أسماء علشان دا مش من حقى.
قيس على كدا أى ترند بيظهر لو مطلعتش مع الترند بتصميم او فيديو يبقى أنت فى الطريق الخطأ
كأس الامم الافريقية مثلا على وصول . أول ما جدول المجموعات ينزل. تعمل تصميم لجدول المجموعات بالونك وطريقتك وتنزلوا على صفحتك وتنزلو فى الجروبات إنه شغلك.
تعمل ديزيين لكل مبارة مهمه الناس شغوفة إنها تتفرج عليها، وعاوزك تبقى كدا فى كل الترندات اللى بتظهر. وبكرة تفتكر كلامى مش هاتلاحق على الشغل!!
6- إياك واليأس
بمجرد ظهورك على السوشيال ميديا ونشر أعمالك . مش كل الناس هاترضى عنك. هاتلاقى منتقدين حتى لو كنت عالمى فى التصميم. دا ولا يهزك .. كمل الطريق.
انا فى مرة نزلت بروجكت كبير كنت عامله ونال إعجاب كل الناس ولله الحمد. راح واحد كتبلى (هى جت عليك أنت يعنى كلها بقت تصممم).
أنا بصراحة أضايقت ولما دخلت على الصفحة بتاعته لقيته كاتب إنه مصمم جرافيك وبيبحث عن عمل.
خلى بالك مش كل اللى بينتقدوك هدفهم يساعدوك. إنما هما حاقدين على شىء أنت وصلت ليه هما مش قادرين يوصلوا لربعه. علشان كدا بقولك لا تلتفت لأى كومنت سلبى. لأنك والله هاتشوف كلام يهد جبال لو ثقتك فى نفسك مهزوزة هاتقع. ثق فى ربك وفى إمكانياتك وتوكل على العزيز الرحيم. فلا يحزنك قولهم...
7- الهدية ملف ورد عليه أهم 140 جروب فى الدعايا والاعلان والتسويق الالكترونى!!.
تعرض أعمالك عليهم وهاتلاقى عليهم وظايف داخل مصر وخارج مصر واون لاين يوميا على الجروبات دى.. فرجنا نفسك
التحميل من هنا
https://drive.google.com/file/d/1GbJNLFqVQbuE6-T9jL1SZ3wsA9flKF_4/view?usp=sharing
نسألكم الدعاء لى بظاهر الغيب. من كان فى قلبة خير لى فليدعو لى ف أنا احوج إلى دعائكم. بارك الله فيكم 
